Protagonistas do recital de Poetas Di(n)versos. Fonte: Concello da Coruña
O ciclo Poetas Di(n)versos, que coordina na Coruña Yolanda Castaño, celebra este 26 de xaneiro unha edición moi especial dos seus recitais. O poeta nixeriano e Premio Nobel de Literatura Wole Soyinka subirá ao escenario da Ágora da cidade nunha sesión na que tamén participará a galega Lupe Gómez.
Esta é a primeira ocasión na que unha persoa galardoada co Premio Nobel participa deste ciclo nos seus 17 anos de historia. Yolanda Castaño lembrou ademais que o nixeriano anunciou a súa inminente retirada da vida públicao, o que fai da cita unha das últimas oportunidades para o ver recitar.
A sesión dá comezo á programación de Poetas Di(n)versos para o primeiro trimestre de 2026. Nesta prevese a participación da grega Dimitra Christodoulou e da galega Carmen Villar o vindeiro 16 de febreiro, mentres para o día 23 de marzo serán o colombiano Rómulo Bustos e o galego Xoán C. Rodríguez os que suban ao escenario.
