A obra Alén e o dragón valeulle a Olaia Sendón facerse co II Certame de Novela Infantil Jaime Olmedo Limeses. O galardón que convoca a empresa avícola Avigal conta cunha dotación de 3.000 euros e inclúe a publicación da obra por Antela Editorial. A esta edición presentáronse un total de 40 obras.
O fallo salienta da obra "a súa calidade literaria, a orixinalidade da proposta e a súa capacidade para conectar cos lectores máis novos". Ademais, apunta "o seu dinamismo, personaxes ben traballadas e referencias á cultura popular". O traballo de Sendón está ambientado no lugar de Sardiruña, onde sempre chove, e arrinca cando Alén comeza a ter soños con dragóns e vellas misteriosas.
