As delegacións de Pontevedra, Ourense en Vigo do Colexio de Arquitectos de Galicia (COAG) daban a coñecer este 16 de decembro a resolución dos premios Gran de Area, cos que recoñecen "o traballo de arquitectos, promotores, aparelladores, construtores e demais colaboradores necesarios, nas obras e proxectos de calidade desenvolvidos" nas zonas referidas.
En total foron doce propostas seleccionadas que "destacan como aquelas que achegan contribucións particularmente valiosas á arquitectura, exemplificando rigor, sensibilidade e calidade arquitectónica". A selección galardoada abrangue desde a recuperación dun alpendre aos traballos de conservación do Museo Massó de Bueu e da Catedral de Ourense ou a recuperación da contorna do mosteiro de Oia. Os premios carecen de dotación económica.
O xurado, composto por membros do COAG das delegacións organizadoras canda a unha persoa en representación dos proxectos galardoados na anterior edición, seleccionou os traballos gañadores entre 60 propostas remitidas ao concurso.
Segundo sinala o fallo, "as propostas recibidas amosaron unha notable diversidade tanto nas súas características como na súa escala, incluíndo proxectos de carácter residencial, dotacional e de espazo público, así como intervencións de restauración, rehabilitación, deseño de interiores e outras actuacións de distinta entidade e complexidade arquitectónica". Ademais, destacan "pola notable calidade e diversidade" que "fixeron especialmente complexa a selección final".
Galería dos Premios Gran de Area 2025
