A arte busca os camiños da profesionalización

A Asociación Profesional de Artistas de Galicia A Colectiva, en colaboración co Centro Galego de Arte Contemporánea, trae a Galicia este venres un formato de xornadas que xa leva tempo organizándose noutras comunidades do Estado español e que responde a unha demanda urxente do sector da arte. Estas I Xornadas de Profesionalización para Artistas, que se celebrarán do 12 ao 14 de decembro nas instlacións do CGAC, en Santiago, xorden co obxectivo de impulsar o pleno desenvolvemento profesional da actividade artística, atendendo ao progreso social, mediante o recoñecemento e a regulamentación do sector artístico e cultural, e loitando contra a precarización da cultura.

Ao longo das tres sesións contarán cun programa no que participarán máis de vinte e cinco relatores: artistas, representantes de asociacións profesionais de artistas —autónomicas (PAAC, AVAAC) e estatais (UNIÓN AC)—, axentes culturais e especialistas do sector galego e estatal que son referentes tanto no ámbito nacional como no internacional. Por parte do Ministerio de Cultura asistirán Txema Urquijo, asesor do gabinete do Secretario de Estado de Cultura e coordinador dos traballos de desenvolvemento do Estatuto do Artista desde 2021, e Jesús Carrillo, Subdirector Xeral de Artes Visuais e Creación Contemporánea. A participación nestas Xornadas está aberta a toda persoa interesada e é totalmente gratuíta.

O broche final das Xornadas será a entrega de recoñecementos simbólicos a figuras, entidades e proxectos salientables do tecido artístico galego, con especial fincapé na aplicación das Boas Prácticas Artísticas e o respecto pola profesión.