O musicólogo Xosé Luís Foxo presentou onte no Consello da Cultura Galega o Cancioneiro Sociolingüístico das Terras do Bolo "Atención pido señores", un vasto volume que recompila medio milleiro de cantares tradicionais, con partituras, letras, fotografías dos informantes e un disco que permite a escoita das composicións. O libro presta atención ás "cantareiras, pandeireteiras, cegos coplistas, rapsodas e gaiteiros" que transmitiron todo este coñecemento tradicional ao longo de cincocentas páxinas. Nelas hai romances, coplas, cantos de traballo, de Reis ou cantos relixiosos e de berce, así como cantos de celebración. As informantes proceden de múltiples aldeas das Terras do Bolo: Lentellais, Outardepregos, Chao das Donas, Teixido, Celavente, Tuxe, Buxán, Navallos, entre outras. A recollida comprende audios ao longo de sesenta anos. A publicación e o seu audio dixitalizado pódese descargar de balde no Consello da Cultura.
