O Teatro Principal de Pontevedra acolle entre os vindeiros 13 e 15 de novembro as VIII Xornadas sobre Antropoloxía. A Sociedade Antropolóxica Galega (SAGA) organiza o encontro anual que se centra nesta ocasión no tema "O poder do símbolo".
Ana Durán abrirá o encontro o día 13 a falar do simbolismo da luz na arqueoloxía relixiosa, mentres Buenaventura Aparicio abordará "a caza do cervo nos gravados rupestres prehistóricos galegos". A sesión finalizará cunha mesa redonda entre os dous relatores.
O día 14 será a quenda da investigadora e traballadora social Pili Silva para tratar a simboloxía das plantas na conferencia "entre a selva dos símbolos e os símbolos da selva", a quen acompañará José Luis Cardero Lopez, doutor en Ciencias Políticas e Socioloxía, nun relatorio sobre "a transición entre signo e símbolo no camiño da identidade, e de como se producen e conservan estes elementos nas distintas comunidades culturais". De novo unha mesa cos dous participantes fechará o encontro.
A terceira sesión das xornadas comezará cunha visita ao Parque Arqueolóxico da Arte Rupestre de Campo Lameiro, con Rafael Quintía a falar encol de "Símbolo, mito e natureza. A construción cultural da paisaxe". Durante a tarde realizarase a presentación do número doce do anuario Fol de Veleno da SAGA, Israel J. Espino tratará a simboloxía sagrada do monstro feminino e Bieito Romero fechará o programa a tratar a "Simboloxía máxica en Galicia (arte e escrita)".
