Pontevedra acolle as VI Xornadas sobre Antropoloxía

A sede da Universidade Nacional de Educación a Distancia (UNED) en Pontevedra acolle entre os días 11 e 12 de novembro as VI Xornadas sobre Antropoloxía. Este encontro, que coordina anualmente a Sociedade Antropolóxica Galega, ten este ano como eixe o lema "Amor, sexo, querer e coidado". As sesións poden seguirse de xeito presencial ou en liña.

Na primeira das sesións, o programa inclúe unha conferencia de Manuela Vilaboy Romero, pedagoga e Xefa da Unidade contra a violencia sobre a muller da Subdelegación do Goberno en Pontevedra co título "O mal querer". O historiador Buenaventura Aparicio Casado, pola súa banda, falará sobre "A proscrición do amor, da ledicia e do sorriso. De El nombre de la rosa ás mouras encantadas".

Para o día 12, a sesión abrirá coa presentación do cuarto número de SAGA. Revista dixital de investigación á que seguirá o relatorio "A muller e o coidado na sociedade galega" a cargo de Ana Durán Penabad. O antropólogo José Luis López Vilapedre fechará as intervencións a abordar o tema "Prostitución, etnografía e historias de vida".