Detalle do videoxogo Hellkind. Fonte: Steam
Un videoxogo de terror ambientado en Santo André de Teixido no que está presente a Compaña ou as meigas. Esta é a proposta de Hellkind, proxecto que desenvolveu o deseñador turco Emir Arkman e que está dispoñible con versión en galego na plataforma Steam.
O videoxogo convida a explorar un hipotético Santo André para evitar un ritual que pode invocar un grande mal ao mundo. Puzzles e desafíos combínanse cunha estética austera que xoga cos erros para crear unha ambientación que produza inquedanza.
Afincado no Reino Unido, o creador do proxecto coñeceu os mitos do noso país a través da produción de animación O Apóstolo e contou coa colaboración de Ana Aboal Beloso, profesional galega con experiencia en varias compañías de videoxogos, para evitar erros lingüísticos e de ambientación.
