Cinco estreas protagonizan a nova edición do FITO en Ourense

O Festival Internacional de Teatro de Ourense celebra a súa décima oitava xeira entre os vindeiro 16 e 26 de outubro. O programa, que se daba a coñecer este día 8, inclúe un total de 24 funcións a cargo de 19 compañías, entre as cales destacan cinco estreas absolutas. Destas, catro fan parte da xornada 67 Graos Ourensefervescénica, que recolle propostas escénicas da mocidade do sector teatral galego.

O día 22 poderán verse estas montaxes, que contaron con cadansúa bolsa de creación, e entre as que o público asistente seleccionará a mellor. Na mesma xornada o festival acollerá a súa quinta estrea, a obra Cuore de Italia, na que a compañía galega Priscila aborda a vida de dúas tripulantes de cabina dunha liña aérea.

Canda a estas, o programa acolle as montaxes galegas Sophie non é o meu nome de guerra, da compañía Redrum, Xoguetes rotos, de Barrosanta en coprodución con ButacaZero, Alta costura de Elefante Elegante, Melón pelado de ButacaZero e Os dous de sempre, da man de Producións Teatrais Excéntricas.

Fóra do noso país, a nómina de obras inclúe Antiga novidade, do creador madrileño Nacho Vera, Feliz día, da compañía arxentina Suttotos, e Amalia y el río, do grupo estremeño Guirigai, que clausurará o festival o domingo 26. A estas funcións súmanse as propostas do programa paralelo, pendente aínda de se dar a coñecer.

Nesta xeira, o proxecto amplía espazos e desenvolverá as súas actividades entre o Teatro Principal de Ourense, o Liceo Recreo Ourensán, a Sala Emilia Pardo Bazán do campus universitario e a Agrupación Cultural Auriense.