O XXVII Festival Galicreques achegará 60 funcións a Compostela

O Concello de Santiago de Compostela acollía este 5 de outubro a presentación da vixésimo sétima edición do Festival Galicreques, que se desenvolve na capital galega desde o día 8 e ata o vindeiro 16. Sesenta funcións a cargo de vinte e seis compañías de oito países fan parte dun programa que inclúe cinco estreas absolutas e outras cinco presentacións europeas. O Premio de Honra que entrega o festival foi neste ano para a compañía arxentina Tres Tigres Teatro.

Nada en 1995 e radicada na cidade de Córdoba, está composta por María Nella Ferrez, Carolina Vaca Narvaja, Jorge Pico Fernández e Delia Perotti. O festival destaca que se trata dun espazo "onde o humano, a emoción e a maxia teatral son fontes inesgotables da creación colectiva. A súa traxectoria e a súa creación escénica abranguen o teatro, o teatro de monicreques, a música e o eido educativo, cun especial interese na visión comunitaria e de servizo da arte".

Entre as novidades deste ano está a posta a en marcha dunha sección especial do festival dedicada especificamente ao público adulto. Baixo o selo Cara Bé. Todo ten outra cara o festival pretende "minimizar a idea preconcibida" de que o xénero dos monicreques é só para público infantil. Dentro deste programa celebrarase o día 14 nunha carpa da alameda o Cabaré Cara BÉ, un espectáculo de variétes no que intervirán compañías e artistas que actuarán ao longo do festival.

Dentro das estreas absolutas do festival está o espectáculo Tolo, coprodución da compañía galega Cinema Sticado e da turca Tiyatro Eksen co Centro Dramático Galego (CDG) que fechará o festival o domingo 16. A franco-galega Nauta presentará pola zona vella da cidade Treboada ese mesmo día, mentres o grupo portugues Caricata, levan o seu Mil e uma ao Teatro Principal o día 15. A Carapuchiña Vermella que artellaron Olga Abad, Raquel Queizas e Carmen Domech e mais Raio de Lubicán de Mircromina Teatro completan as presentacións.

A nivel europeo, poderán verse por vez primeira nese evento Trapos de Pasos largos do uruguaios Coriolis. Desde Perú Hugo e Inés representarán Miniaturas, os arxentinos de Tres Tigres Teatro achegarán ¿Qué hacemos con Ubú? e os chilenos Lotitere interpretarán Culuti.

Canda ás funcións abertas a público xeral, o festival desenvolve tamén un programa escolar específico e un obradoiro de formación dedicado ao títere coral a cargo de Raquel Garabal e Pilar Pingarrón, da Compañía Nauta.