Unha mostra didáctica repasa a produción de videoxogos en galego

Dar conta dos videoxogos que están dispoñibles na nosa lingua, tanto por se teren elaborado no noso país como por contar con traducións. Esta é a proposta de O videoxogo en galego, exposición que abría as súas portas este 1 de outubro no IES Politécnico de Vigo e que percorrerá diferentes centros de ensino secundario da provincia de Pontevedra.

A mostra, que está dispoñible en liña, é unha iniciativa do Departamento de Tradución e Lingüística da Universidade de Vigo comisariada por Óscar Ferreiro Vázquez, Ramón Méndez González e José Yuste Frías. O proxecto fai un percorrido por 28 títulos dispoñibles no noso idioma, desde éxitos internacionais como Minecraft a proxectos como o Wordle. Canda a estes, títulos históricos realizados no noso país como O misterio das 7 pezas, The Waylanders ou A aventura máxica de merliño.

Para alén dos paneis físicos, a mostra combina pezas expositivas físicas e dixitais, materiais informativos e un catálogo divulgativo interactivo dispoñible a través dun código QR. A súa presenza nos centros complementarase con obradoiros, charlas e unha narrativa interactiva "deseñada para traballar aspectos culturais e lingüísticos de forma lúdica e creativa", segundo sinala a organización.