A Xunta recibe a doazón de 32 cartas inéditas de Curros Enríquez

A Cidade da Cultura acollía este xoves 18 de setembro a sinatura da doazón á Xunta de 32 cartas inéditas de Manuel Curros Enríquez. O legado, que inclúe ademais fragmentos doutras misivas incompletas, foi cedido por Emilia García Paadín e correspóndese con cartas polo poeta entre xuño de 1904 e xaneiro de 1908, só tres meses antes do seu pasamento, a José Ojea, boticario de Cortegada, escritor, político e un dos fundadores da Real Academia Galega.

Segundo destacou Xesús Alonso Montero, destacado investigador das figuras literarias do Rexurdimento, no acto de presentación do material, estes textos amosan "o Curros máis humano e afectuoso" ao se desenvolver no marco dunha relación de fonda confianza e amizade que o unía con José Ojea e coa súa filla Octavia.

Nas cartas, repásanse diferentes cuestións da actualidade do momento, a incluír a problemática situación familiar de Curros Enríquez na altura, así como diferentes conflitos nos que se atopa e as súas críticas á xestión do Centro Galego da Habana ou á creación da Academia Galega. Os textos permiten coñecer tamén as relacións entre persoeiros da época como Emilia Pardo Bazán, Enrique Peinador, Manuel Murguía, Rosalía ou Chané.

Logo da recepción desta doazón, a Xunta desenvolverá un proceso de análise, estudo e restauración do material para o pór a disposición do público.