Quiosco: Unión Libre publica a arte epistolar de Luz Pozo Garza

Un monográfico dedicado ás cartas que Luz Pozo Garza enviou ao longo de tres décadas ás persoas responsables da publicación. Esta é a proposta que achega o número 25 de Unión Libre. Cadernos de vida e culturas baixo o epígrafe "Arte epistolar". A publicacion recupera unha escolma dos textos e ilustracións das misivas que a poeta enviaba a Carmen Blanco e a Claudio Rodríguez Fer, responsables do proxecto, ao abeiro das súas colaboracións nesta publicación.

Segundo explica a dirección da revista na presentación do volume, que está dispoñible para a súa libre descarga, "Luz Pozo Garza enviounos, dende 1989, interesantes e preciosas cartas dende Vigo, A Coruña, Dublín e Toulouse, a miúdo con poemas e con debuxos inéditos da súa autoría, constituíndo unha auténtica obra de arte epistolar que aquí damos a coñecer por primeira vez". Segundo apuntan, hai moito material aínda pendente de exhumar dentro desta mesma correspondencia. "Nesta primeira edición reproducimos os poemas que nos dedicou a nós ou a nosa filla Mariña, para non adiantar demasiado material da súa obra poética dispersa que terá que compilarse algún día. Ademais, os longos, variables e complexos procesos de elaboración dos seus libros Rosa tántrica, que seguimos día a día, e Pazo de Tor, cuxa edición realizou Carmen Blanco, deron orixe a unha gran cantidade de envíos dos que agora reproducimos tan só os máis significativos para evitar recargar esta exhumación cunha casuística ecdótica demasiado prolixa".