Iribarne, a obra de teatro gañadora de nove galardóns nos premios María Casares de teatro deste ano, abrirá o Festival Internacional de Artes Escénicas de Uruguai, con representacións no Teatro El Galpón de Montevideo. A obra escrita e dirixida pola rianxeira Esther Carrodeguas inicia así a temporada outono-inverno. O resto da xira levará polo momento a Iribarne por León, Alcorcón, Altsasu, Basauri e Pamplona. Iribarne foi estreada polo Centro Dramático Nacional e revisa a vida do político Manuel Fraga Iribarne. Nos premios María Casares recibiu os galardóns por mellor espectáculo, dirección, dirección de movemento, texto orixinal, actriz protagonista, actor protagonista, espazo sonoro, vestiario e espazo escénico (este último compartido con 'O dragón de ouro').
