Lionel Rexes Foto cedida por Fundación Xosé Neira Vilas
Se fai agora un par de anos (2023) Lionel Rexes (París, 1971) gañaba o VIII Premio Xosé Neira Vilas de Novela Curta, agora ven de facerse co galardón que leva por nome o da máis famosa personaxe de Neira Vilas. O Xº Premio Balbino de Relatos convocado por Edicións Fervenza coa colaboración dos concellos de Vila de Cruces, Boqueixón e Silleda e mais da Deputación de Pontevedra e da Secretaría Xeral de Lingua, ademais do apoio da Fundación Neira Vilas. O xurado decidiu por unanimidade outorgar o galardón á obra titulada 'As donas da noite' presentada baixo plica e que unha vez aberta resultou ser da autoría do escritor lucense Lionel Rexes. O xurado cualifica de "prosa poderosa" o estilo literario da obra vencedora "que agradará a aquel lectorado que desexe contemplar o noso rural cunha outra ollada", explican.
O certame ten como temática principal o rural, o mar e a emigración e ten un premio de 1.500 euros á obra gañadora e a súa publicación en Edicións Fervenza. Segundo consta na acta, o xurado destacou da obra vencedora "a súa inmersión nun rural galego poliédrico no que convive o herdo espiritual de séculos coas novas realidades sociais, laborais e relacionais". No mesmo senso a acta sinala tamén "a visión dunha aldea complexa, multifacetada e arredada do bucolismo idílico doutrora, que nestas páxinas é substituído por poderosas personaxes que nos enfrontan coas problemáticas de supervivencia do noso agro, os movementos asociativos de base e a convivencia entre tradición e modernidade".
