A relación entre arte, creación e territorio protagoniza a vixésima xeira das Xornadas A Cultura é un Dereito que organiza a Deputación da Coruña. A Fundación PazosCuchillo, en Trasanquelos (Oza-Cesuras), acolle este 28 de agosto o encontro, no que diferentes presentacións, mesas redondas e relatorios porán o foco na comarca das Mariñas como exemplo de dinamismo cultural.
Segundo apunta a Deputación "as xornadas pretenden favorecer o intercambio de experiencias, estimular a colaboración entre proxectos e dar a coñecer os espazos e iniciativas que fan posible a actividade artística no territorio. O obxectivo é, así mesmo, abrir un diálogo sobre o papel que teñen os axentes culturais e as creadoras e creadores na construción dunha identidade cultural compartida, diversa e aberta ao futuro".
O programa arrincará de mañá cunha visita guiada á Fundación PazosCuchillo e un relatorio sobre a situación socieconómica da comarca. A estes seguiralle un coloquio sobre espazos dinamización cultural no que participarán a Fundación CIEC, a Libraría Biblos-Biblos Clube, o laboratorio creativo Espazo Vaina da asociación CRÚA, o Mosteiro de Bergondo e o Espazo BAM de Betanzos.
A sesión de tarde centrarase nas persoas que fan cultura no territorio, a contar con intervencións de Carlos Pazos, Pedro Lamas, Antía Yáñez, Correa Corredoira, Iria Fafián, Isabel Durá, Sabela Caamaño e SaraSal. Intervencións de feche a cargo de Xesús Fraga, e de Sara Fraga, e un concerto dos grupos Altalaplana e Furallefalle completan o programa. A inscrición está aberta no web das xornadas.
