O Parque Tecnolóxico de Galicia saca a concurso a realización dun mural

Un total de 42.350 euros para o deseño e execución dun mural de arte urbana sobre un depósito de auga. Esta é a proposta que o Parque Tecnolóxico de Galicia saca a concurso para decorar este elemento que fai parte das instalacións da Tecnópole, a súa sede no concello de San Cibrao das Viñas.

Segundo indica a entidade, "a obra obxecto deste concurso é unha construción do ano 1992, realizada sobre formigón. Está integrada por un depósito duns 5 metros de altura e 24 metros de diámetro exterior; e un pilastre duns 25 metros de altura e 2,50 metros de diámetro. A superficie total a pintar estímase que é duns 570 metros cadrados. O mural debe incluír as dúas partes da estrutura, tanto o piar como o depósito".

Entre as condicións do concurso está que "a obra sexa visible desde fóra do Parque, que se poida apreciar a distancia" coa intención de achegar a sede á ciudadanía. Ademais as condicións do concurso procuran que a obra "reflicta algúns dos eixes fundamentais sobre os que se desenvolve Tecnópole, como son a tecnoloxía, a innovación e o talento; a divulgación; e a sostibilidade".