Cruceiro do Hío, con Eva e Adán no pé do fuste. Fonte: Turismo de Galicia
A Policía Local de Cangas identificaba este 21 de xullo a persoa que arrincou a figura do Adán que fai parte do coñecido Cruceiro do Hío, en Cangas. Os feitos desenvolvéronse na noite do pasado día 15 cando un veciño de Vigo subiu ao monumento e arrincou o fragmento, situado no fuste do cruceiro, ao se agarrar a el.
O responsable dos danos depositou o Adán, que xa fora arrincado da súa posición noutras ocasións, no propio pedestal do monumento antes de fuxir. Como efecto do desprendemento, a peza partiuse en dúas partes. O Concello contactou xa co Arcebispado de Santiago, propietario do cruceiro, para abordar a súa restauración.
