Rouban a imaxe do Cruceiro Novo da Pobra do Caramiñal

A denuncia dunha veciña puxo en alarma á Policía local da Pobra do Caramiñal, no Barbanza. A escultura da Virxe e o Neno, ubicaba no Cruceiro Novo, na parroquia de San Isidro de Postmarcos, fora substraída aproveitando o confinamento. A peza estaba ubicada nun dos característicos cruceiros de capela na comarca, nunha paraxe pouco frecuentada e nun camiño sen asfaltar e xa fora obxecto nas últimas décadas de intervencións de restauración. O cruceiro está datado na Idade Moderna aínda que segundo Antonio González Millán, a escultura podería pertencer a un cruceiro anterior e ser elaborada no século XVI. O Barbanza continúa a ser unha zona cero de agresións ao patrimonio durante o confinamento provocado pola pandemia global, pero dáse a circunstancia de que tamén a principios de ano, na Pobra do Caramiñal, foi substraída outra imaxe, un San Xoán Evanxelista, que estaba situado nun fornelo á entrada da casa de Casto Dios.