Os veciños do lugar de Currás, en Marín, avisaron ao Concello do grave risco que corre o menhir que os arqueólogos localizaron na parroquia durante a prospección arqueolóxica levada a cabo antes de comezar as obras da estrada de circunvalación. A Dirección Xeral de Patrimonio decidira o desprazamento cunha grúa do menhir, de 9.500 quilos, cara un terreo próximo ao estimar a súa importancia: o número de monumentos megalíticos deste tipo catalogados en Galicia é mínimo e pensouse nunha futura posta en valor. Mais as obras da estrada continuaron avanzando e agora mesmo o menhir atópase ao borde da escavación da estrada cun alto perigo de caerse e rachar. Xunto ao emprazamento orixinal do menhir realizouse unha cata arqueolóxica que encontrou cerámica, fragmentos dun muíño de man e diferentes ferramentas feitas con cuarzo, o cal documenta por primeira vez a relación entre os menhires e a vida cotiá na prehistoria galega. Patrimonio comprometeuse a enviar inspectores ao depósito.
Máis información na edición de hoxe do Diario de Pontevedra
