A Residencia Literaria 1863, na Coruña, acolle desde este 1 de xullo o poeta Ismael Ramos. O autor fíxose coa I Residencia Deleite Literario, que convocou esta marca alimentar para autoras e autores na nosa lingua. Ramos pasará o mes de xullo dedicado á creación dun novo poemario, para o que contará ademais cunha dotación económica de 3.000 euros.
O xurado que seleccionou o gañador desta iniciativa estivo composto Berta Dávila, Alba Cid e Jesús Castro Yáñez. No fallo destacaron "a coherencia e o rigor do proxecto presentado, que entrelaza a linguaxe da natureza coa memoria oral do territorio, ao tempo que reflexiona sobre os mecanismos de espolio que o ameazan". A convocatoria está coorganizada coa propia Residencia 1863.
