A concelleira de Igualdade, Nereida Canosa, o concelleiro de Cultura, Gonzalo Castro, e a poeta Yolanda Castaño. Foto: concello da Coruña
O concello da Coruña presentou onte a primeira Bolsa de residencia de Conciliación para nais escritoras (ou principais coidadoras). A iniciativa terá lugar na Residencia Literaria 1863, dirixida por Yolanda Castaño, e conta co financiamento de varias concellerías do concello da Coruña. A convocatoria está aberta desde hoxe no web do concello da Coruña ata o 31 de maio. A persoa seleccionada gozará dunha estadía do 1 ao 30 de agosto de 2025 na residencia, con desprazamento, aloxamento, manutención e "o traslado e coidado dun dos seus fillos ou fillas. O menor disporá, de balde, dun servizo municipal de conciliación". É a primeira residencia literaria convocada en Galicia que inclúe este servizo.
