Un cento de pezas combinadas nun total de 26 traxes tradicionais compoñen a primeira exposición de carácter histórico que organiza a Asociación do Traxe Galego. O colectivo compostelán celebra as súas tres décadas de vida con esta proposta que se pode contemplar na Hospedería de San Martiño Pinario ata o final de xuño.
O proxecto reúne traxes datados entre 1820 e 1900, cunha maioría de conxuntos orixinais e só dúas réplicas. Xoias, curiosidades como un traxe infantil propiedade de Gerardo Fernández Albor e exemplos das indumentarias propias de distintas provincias atópanse neste proxecto que permite comprobar a evolución do traxe tradicional no noso país.
