Nova edición de 'Vilagarcía, Cidade do Libro'

A quinta edición de 'Vilagarcía, Cidade de Libro' celebrarase na vila do Salnés entre o 10 e o 15 de xuño no parque Miguel Hernández e contará coa presencia de importantes referentes do panorama nacional. O último Premio Planeta, Paloma Sánchez-Garnica; un dos escritores máis vendidos, Juan Gómez-Jurado; a revolución da literatura xuvenil, Joana Marcús ou a escritora de misterio María Oruña, entre moitos outros, daranse cita na localidade. O formato local de achegamento aos libros e a lectura volve propoñerse un ano máis como alternativa ás feiras convencionais baixo o lema 'Ti tes a chave', que convida a dar o paso de entrar na literatura.

Todos os días entre as 10:00 e as 13:00 horas haberá unha sesión do 'Literatour', unha actividade en colaboración cos centros escolares coa que se busca inculcar o hábito lector. A zona de presentación, exposición e venda de libros abrirá todas as tardes a partir das 18:00 horas e ata as 21:00. Na fin de semana o horario amplíase ás mañás, de 11:30h a 13:30h. Os autores estarán firmando por días en horario de tarde: o martes 10 ás 18:00 horas estarán Paloma Sánchez- Garnica, Juan Gómez-Jurado e Rober Cagiao; o mércores será a quenda dos poetas Andres F. Maneiro, Samuel L. Paris, Clara Pino e Xerardo Quintiá, dende as 19:00 horas; o xoves 12, firmarán Rosa Aneiros, Alonso de la Torre e Máximo Huerta (18:00h); o venres, Joana Marcús (tras a presentación do seu libro, sobre 19:30 horas), Ana Merino e Fina Casalderrey; o sábado, María Oruña, Juan Tallón, Paula Mayor e Manuel Vilas (19:00h); e por último, o domingo 15 (17:30) será a quenda de Rebeca Stones, Antía Yáñez e Inma Rubiales (necesaria reserva de tíckets online). Tras as sinaturas comezarán as 'Conversas ao solpor' ás 20:30 horas no escenario principal. A programación inclúe unha visita á Illa de Cortegada. Nesta ocasión, será o sábado 14 a partir das 17:30 horas e da man de María Oruña, que presentará a súa nova novela 'El albatros negro'. Para participar é necesaria a inscrición previa a partir do 2 de xuño na Oficina de Turismo. É de balde e hai 25 prazas dispoñibles.