Iván Caloto imponse no VIII Premio de Textos Teatrais Roberto Vidal Bolaño

A oitava xeira do Premio de Textos Teatrais Roberto Vidal Bolaño que convoca a Editorial Galaxia ten xa gañador. Iván Caloto foi declarado este 22 de maio vencedor do certame co texto Os rapaces só se tocan para darse de hostias. O autor recibirá un premio de 2.000 euros en metálico e verá a súa obra publicada por Galaxia.

O fallo do xurado destaca da peza "a capacidade para afondar no miolo dos conflitos sociais e persoais; e na orixe dos prexuízos. Explora a necesidade de pertenza ao grupo que todos temos con personaxes verosímiles e recoñecibles". O traballo gañador é unha "obra coral que nos ofrece moitas voces, con diálogos áxiles, que axudan a configurar o drama presentado".

Celia Díaz Núñez, escritora e dramaturga; Nadia Geijo Domenech, actriz; Delio García Represas, profesor e coordinador dos Contratos programa de Teatro do IES Ribeira do Louro; e Raquel Castro, como secretaria, conformaron o comité de selección.

Caloto obtivera en 2023 o Premio Fin de Carreira de Ensinanzas Artísticas Superiores en Arte Dramática, na especialidade de Dirección escénica e dramaturxia, cursada na Escola Superior de Arte Dramática de Galicia.