A Fundación Xosé Neira Vilas deu a coñecer este 10 de maio o fallo da cuarta edición do Premio Anisia Miranda de Teatro para a infancia. Lidia de la Fuente fíxose co galardón, dotado con 1.000 euros, coa obra O tesouro, que será publicada por Edicións Embora.
O fallo destacou "a viveza dos diálogos, o uso intelixente dos recursos escénicos e o hábil emprego do humor" no texto. O xurado estivo composto polos membros do Padroado da Fundación Pilar Sampedro e Fernando Redondo, xunto co dramaturgo e académico da RAG Euloxio Ruibal.
A entrega do premio terá lugar o vindeiro domingo, día 18 de maio na sede da Fundación en Gres (Vila de Cruces). O acto contará cunha actuación do cantautor Armando González.
