Lela edicións presenta a súa publicación polo Día das Letras

Co título Cantareiras. A poesía popular no Día das Letras 2025, Lela Edicións presentou a publicación coa que se suma ás homenaxes deste 17 de maio. Ilustracións de Tania Solla complementan un texto do colectivo Polo Correo do Vento que repasa o traballo de Dorothé Schubarth a elaborar o Cancioneiro Popular Galego.

Para alén de homenaxear o traballo da etnomusicóloga, o volume de 32 páxinas explica tamén o labor das cantareiras homenaxeadas este ano e a súa importancia como transmisoras deste patrimonio inmaterial. Segundo explica a presentación do volume estas mulleres "foron creadoras e transmisoras de arte e beleza malia a vida difícil que lles tocou vivir".