O Londres dos anos 60 coa cámara de David Bailey na Fundación MOP

A Fundación Marta Ortega Pérez (MOP) ven de dar a coñecer a súas seguintes exposicións para esta primavera e o verán. Como prato forte preséntase a mostra do fotógrafo de moda David Bailey, 'David Bailey’s Changing Fashion', a quinta que organiza a fundación sobre icónicos fotógrafos da historia da moda. Bailey foi un definidor da revolución creativa e cultural que deu impulso á vibrante escena londiniense dos anos 60. A mostra que se inaugurará o 28 de xuño de 2025 no Peirao de Batería da Coruña, somerxerá aos visitantes no glamour e a enerxía das décadas de 1960 e 1970. Contará con máis de 140 fotografías destas décadas, algunhas delas inéditas, e permanecerá aberta ata o 14 de setembro. Na exposición poderanse ver tamén a membros da escena londiniense, desde Mick Jagger a Rudolf Nuréyev, Shrimpton, Michael Caine, Cecil Beaton e, aos coñecidos gánsteres Ronnie e Reggie Kray, todos eles membros di círculo de Bailey.

Antes desa gran exposición, entre o 20 de maio e o 17 de xuño, o Silo do Centro MOP acollerá a exposición colectiva 'Future Stories' coas obras de catro novos fotógrafos galegos: Alba Chan, Sofía Dagá, Lucía Novais e Adrián Ramos. Durante tres meses, estes titulados en Fotografía polas escolas de Arte e Superior de Deseño de Santiago de Compostela, A Coruña e Ourense mantiveron en Milán un intenso programa académico con foco na fotografía de moda financiado pola Fundación MOP e deseñado pola Fondazione Sozzani, durante o cal desenvolveron os proxectos artísticos que se exporán agora.