O Museo do Pobo súmase ás homenaxes a Díaz Pardo

Isaac Díaz Pardo, que fora membro fundador e presidente do padroado do Museo do Pobo Galego, protagoniza a programación do centro o vindeiro mes de abril. A coincidir coa celebración do Día das Artes dedicado á súa figura, o Museo desenvolve un programa especial que bota a andar o día 2 coa conferencia Isaac Díaz Pardo. Memoria do compromiso a cargo de Xosé Ramón Fandiño.

Para o venres 4, a intervención Espazos contra o baleiro percorrerá a figura do homenaxeado a atender "o seu papel na refundación do Seminario de Estudos Galegos, a súa particular vinculación co Museo do Pobo Galego e o seu labor a prol da memoria histórica". Documentación gráfica e bibliográfica e unha escolma de pezas da súa autoría que fan parte dos fondos da entidade compoñen esta proposta.

A fechar a iniciativa, un faladoiro o venres 24 de abril, baixo o título Isaac Díaz Pardo creador do Laboratorio de Formas abordará este aspecto da súa carreira da man de Xosé Luís Axeitos, María América Díaz, Fernando Arribas e Carmela Montero.