Sociedade Coral Polifónica de Pontevedra
A Real Academia Galega de Belas Artes ven de outorgar a súa Medalla de Ouro "Marcial del Adalid" á Sociedade Coral Polifónica de Pontevedra, celebrando o centenario da súa fundación. A RAGBA recoñece nesta agrupación musical a "traxectoria acreditada dun século de actividade artística do máis alto nivel". Este galardón é o primeiro de ámbito galego recibido pola coral nos seus cen anos de historia.
A Coral celebrará o vindeiro día 9 o concerto do centenario, na data que coincide co primeiro recital da formación e tamén no mesmo espazo, a igrexa de San Francisco. No marco desta conmemoración, o 'Museo de Pontevedra acolle a exposición Sociedad Coral Polifónica de Pontevedra 1925-2025, cen anos de música coral en Galicia'.
