Os Bologna Raggazi Awards, galardóns que promove a Feira Internacional do Libro Infantil de Boloña, contan nesta xeira cun nome galego no seu palmarés. A editora Fabulatorio obtivo unha mención especial na categoría Toddlers destes premios, que recoñece libros para público de 0 a 3 anos.
O volume Numbers, publicado en nove idiomas, está asinado por Cibrán Rico López e Suso Vázquez Gómez con ilustracións de Álvaro Valiño e propón un achegamento lúdico e sensorial aos números. Este é o primeiro libro para público destas idades publicado pola firma viguesa.
O premio supón un importante recoñecemento á editora, xa que cada ano preséntanse a este certame preto de 3.000 libros de diferentes países.
