Ata o vindeiro 21 de marzo está aberto o prazo para presentar propostas ao novo Fondo de apoio a proxectos culturais singulares para a mellora social. A Área de Cultura da Deputación da Coruña convoca este certame que "premiará iniciativas culturais que desenvolvan propostas en lingua galega de interese para campos de acción social coma a igualdade, dereitos civís, respecto á diversidade, respecto medioambiental, medre da estima colectiva e cohesión social, integración social, memoria democrática ou sensibilización patrimonial e identidade local".
A proposta substitúe a antiga liña de apoio a proxectos singulares de especial interese cultural, que xa non se convocara en 2024. Como aquela, o novo certame está orientado a empresas e entidades con ánimo de lucro. No canto de distribuír subvencións que cobren porcentaxes de cada proxecto, o Fondo distribúe premios que oscilan entre os 7.500 e os 22.500 euros. O orzamento total da convocatoria é de 300.000 euros, 25.000 euros máis do que a anterior.
Deste xeito, os cinco proxectos de maior puntuación recibirán un importe ata o máximo establecido, mentres os cinco seguintes optarán a unha achega máxima de 17.500. No seguinte tramo de puntuación, cinco proxectos poderán levar ata 12.500, e os cinco últimos seleccionados terán un máximo de 7.500.
Segundo apuntou Natividade González, responsable de Cultura no organismo provincial, a convocatoria supón "outra aposta do noso departamento por políticas públicas que apoien claramente a diversidade cultural e garantan o dereito á produción e ao acceso cultural no noso idioma, que se atopa nunha situación preocupante".
