O CCG pon en liña 48 números de 'Vivero en Cuba'

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de febreiro 48 números recuperados da revista 'Vivero en Cuba', publicación oficial da Sociedade de instrución "Vivero y su comarca". Pódese consultar xa en liña esta publicación, de periodicidade mensual que estivo activa desde 1911 ata 1957, aínda que tivo varias interrupcións ao longo da súa traxectoria. A revista responde ao arquetipo das publicacións societarias xa que describe as actividades da sociedade, ofrece información económica sobre as realizadas, publica novas da comarca e artigos diversos sobre Galicia, notas sociais e páxinas literarias.

A Sociedade impulsora da revista naceu coa vontade, segundo os seus Estatutos, de "construir edificios para escuelas en todas las parroquias de los Ayuntamientos de Vivero, Orol, Muras, Riobarba, Jove y Cervo, y crear una escuela de Artes y Oficios". Tiña como lemas varias frases de Concepción Arenal "Cada escuela que se abre, es una cárcel que se cierra" ou "La instrucción es de necesidad pública". Na súa elaboración colaboraron figuras como Alberto Michelena; Andrés Prieto; Blanca Espinar; César Michelena Rebellón; Constantino Horta; D'Arxellas ou Vicente Otero Cao. Escribiuse maioritariamente en castelán reservando o galego para algunha creación poética. Intercalados entre os artigos hai numerosos anuncios comerciais, de compañías navieiras, bancos e aseguradoras.