O vindeiro 8 de marzo comeza a súa actividade en Ortigueira o LAB-Laboratorio de Cántigas Novas. O Festival Internacional do Mundo Celta que se celebra nesta localidade abre este novo espazo de formación no campo da música tradicional coa dirección de Ugia Pedreira e Óscar Górriz e coa colaboración da escola de gaitas municipal.
A proposta formativa, que se desenvolverá en sábados alternos ao longo de cinco meses "busca impulsar a creación artística a partir da riqueza da lírica galega de tradición oral" cun "programa único que combina investigación, creación colectiva e individual, e actividades comunitarias. O obxectivo principal é promover a creación de novas cántigas e pezas musicais, resignificando o patrimonio herdado e abrindo diálogos con outros estilos e formas poéticas". O programa pretende así "nutrir a creatividade persoal e comunitaria, posicionando a música galega contemporánea como referente emerxente dentro das músicas tradicionais ibéricas".
O programa do curso inclúe nocións históricas sobre a música tradicional, explicación dos xéneros e paus deste patrimonio, introdución á harmonía, estruturas e dinámicas de composición ou nocións sobre rima e a improvisación oral entre outros contidos. As sesións contarán con profesorado como Ramom Pinheiro, Alba María, Pedro Pascual ou Alejandro Vargas.
O LAB conta cun total de 25 prazas que pagarán unha matrícula de 200 euros, e ten aberto o prazo de inscrición ata o vindeiro 24 de febreiro. O Museo do Pobo Galego, en Santiago de Compostela, acolle este día 14 un acto de presentación da iniciativa.
