A renovación do web da deputación de Ourense permite acceder ás súas publicacións

A Deputación de Ourense ven de presentar unha profunda actualización da súa páxina web institucional proporcionando novos recursos de acceso aos seus contidos. Por unha banda, a mellora permite o acceso ao catálogo do Servizo de Publicacións provincial, que recolle todo o que publicou ata o momento a Deputación. Algunhas das publicacións poden descargarse e noutras é posible a adquisición a través da propia páxina. Obras científicas, artísticas, literarias ou musicais, tanto de autores ourensáns como de outros divulgadores da realidade de Ourense está agora ao alcance do público dun xeito doado. A Deputación ten editados case 600 títulos, que reflicten o esforzo que o organismo provincial dedica a este tipo de difusión. Na web pódese consultar o catálogo editorial de diferente formas: por palabras chave, por autor, título ou ano de publicación. Ademais, pódese acceder a diferentes categorías ou temas aos que se refiren as publicacións, como a provincia en imaxes, biografías e personaxes de Ourense, compilacións de artigos publicados en prensa, emigración, patrimonio ou termalismo.

Por outra banda, o Boletín Oficial da Provincia (BOP), o xornal oficial no que se publican as resolucións das diferentes administracións públicas, da Administración de Xustiza e de particulares -asuntos que se circunscriban á provincia de Ourense- estrea unha nova ferramenta dixital que convirte á publicación electrónica en referente de accesibilidade. A través do portal situado en internet xa está dispoñible unha funcionalidade que permite escoitar tanto o índice coma os edictos do BOP. O botón de escoita, dispoñible ao inicio da páxina oficial e en todos os edictos, supón unha mellora en accesibilidade dixital, xa que ofrece unha mellor experiencia ao maior número posible de persoas, incluídas aquelas que teñan algunha discapacidade como, por exemplo, persoas con discapacidade visual, pero tamén outros usuarios do boletín que teñan dificultades neurocognitivas ou discapacidades intelectuais. Dende a Área de Transparencia e Goberno Aberto infórmase tamén que están a traballar noutra funcionalidade que complemente a que agora se presenta, e orientada a facilitar a navegación integral a persoas con outros tipos de capacidade. O obxectivo e chegar ao 100% da poboación independentemente da súa capacidade ou condición física.