Malasombra producións estrea O proceso en Celanova

O Auditorio Municipal de Celanova acolle este venres 7 de febreiro a estrea absoluta de O proceso. Malasombra Producións pon en escena esta montaxe que, en ton de comedia, dá conta do xuízo que sufriu Manuel Curroz Enríquez logo de ser acusado de herexía polo contido da súa obra Aires da miña terra.

Cándido Pazó escribiu e dirixe esta proposta que conta con Jouse García, Marcos Orsi, Paula Pier e Xoque Carbajal sobre o escenario a darlle vida a once personaxes diferentes. Segundo apunta a compañía, O proceso é "unha peza teatral que, en ton de sainete cómico protagonizado por unha galería de personaxes populares do Ourense de finais do XIX, aborda con frescura e desenfado, pero con rigor e reflexión, a cuestión do hoxe en día chamado 'lawfare', así como outros temas (a lingua, a cultura, a identidade...) que seguen vixentes na actualidade".

A peza partiu da publicación do Consello da Cultura Galega e o Ilustre Colexio de Avogados de Ourense O proceso penal a Manuel Curros Enríquez (1880 – 1881), que recolle as actas oficiais do proceso canda a un prólogo e un estudo. O pasado mes de setembro, Celanova acollera tamén a estrea de O Rexurdimento do Divino Sainete da compañía LaGriot'te, que tamén trataba o xuízo a Curros.