O teatro revisa o xuízo a Curros Enríquez en 'O Rexurdimento do Divino Sainete'

Partindo dunha representación interrompida da peza 'O Divino sainete' de Manuel Curros Enríquez a compañía galego-andaluza LaGriot'te propón un percorrido pola vida do escritor e ao tempo unha reflexión no espectáculo 'O Rexurdimento do Divino Sainete' que se estrea este domingo en Celanova. Esta sátira sitúa ao poeta e á xograresa LaGriot'te nunha viaxe en tren rumbo a Jacobusland. Cada un dos vagóns do tren presenta un dos pecados capitais encarnados en persoas e situacións da vida de Curros Enríquez que o poeta tivo que padecer. As personaxes veranse en medio do xuízo que condenou a Curros a dous anos, catro meses e un día de prisión correccional con multa de 250 pesetas, pola denuncia dun bispo por "atentar contra do libre exercicio dos cultos", ao entender, o xuíz de instancia de Ourense, que os versos de Aires da miña terra contiñan aldraxes e burlas a Deus e o Papa.

A obra conta con dirección e adaptación de Nazan L. Bamio, e coas interpretacións de Sandra Gade, Celina Fernández Ponte e Marcos Grandal, ademais da colaboración de Marcelino de Santiago 'Kukas' para a creación de monicreques. A escenografía, vestiario e atrezzo e deseño de iluminación deste espectáculo corre da man de As Dúas E Punto. 'O Rexurdimento do Divino Sainete' preséntase coma un espectáculo visual, no que se traslada o universo creado por Curros para invitar a pensar sobre o noso contexto social a través do amosado na peza de Curros e o seu enxuizamento. Como o incremento da intolerancia ou do extremismo nas opinións e ideas, os conatos de censura e situacións de autocensura, o sensacionalismo á hora de abordar certos temas delicados, as guerras incivís que nos rodean, o exceso da avaricia na toma de decisións que se amosa na corrupción, moral ou económica e todo a través da ironía, a sátira e o humor. LaGriot'te é unha empresa galaico-andaluza fundada en Londres polo produtor e director de escena Nazan L. Bamio e a actriz e directora de movemento Sandra Gade. A estrea terá lugar no Auditorio Municpal de Celanova este 15 de setembro ás 20:00 horas.