Unha viaxe hipnótica ao redor da queimada

Entre as múltiples facetas ilustradoras e deseñadoras de Xosé Vizoso está a dunha singular colección: os carteis que desde o ano 1994 leva deseñando para a Queimada Popular de Cervo, un singular evento festivo declarado de interese turístico que se iniciou en 1978. O conxunto de 27 carteis permite observar moitos dos trazos da arte de Vizoso: as composicións complexas e hipnóticas, cun ritmo interior, as cores rechamantes, a conexión coa tradición do deseño galego que entronca con Castelao e que continuou nos seus traballos en Sargadelos. Os carteis foron cedidos pola asociación cultural Airiños do Xunco, promotora da Queimada de Cervo, e o especial acompáñase cun artigo de Francisco Piñeiro sobre as orixes da festividade. O Día da Ilustración Galega está promovido pola Asociación Galega de Profesionais da Ilustración (AGPI)