Concibido como "unha homenaxe ao legado das mestras pandeireteiras", o novo proxecto incorpora en todos os seus temas colaboracións de artistas e formacións tradicionais como Cantigas e Agarimos, Cántigas e Frores, O Fiadeiro ou Ultreia, a recoñecer o traballo destes colectivos.
O grupo estrea neste proxecto a incorporación da zanfonista ferrolá Manu Fraguela que se suma a Ánxela Carou (voz e percusión), Manuele Pardo (voz, percusión e gaita), e Xan Pampín (acordeón e batería).
Entre os dez cortes do álbum atópase o singular A donzela guerreira, romance ibérico no que contan coa colaboración de Nikolay Velikov, e mais a incorporación do ritmo da mazurca, pouco habitual nos repertorios tradicionais, que o grupo chama a recuperar.
Taboada, o vindeiro día 21 de decembro, a Sala Rebullón de Vigo o 22 e a Praza Roxa de Santiago de Compostela, o 28 son as seguintes datas previstas na xira de presentación do grupo.