Os eventos galegos acumulan candidaturas nos Iberian Festival Awards

Ata o vindeiro 17 de xaneiro está aberto o prazo para que o público vote nas diferentes categorías abertas do Iberian Festival Awards. Os principais galardóns dos eventos de música ao vivo da Península contan nesta xeira cunha nutrida participación galega, con propostas como o 17º Ribeira Sacra, a acumular trece candidaturas, o PortAmérica, con doce, o SonRías Baixas, con once ou o Underfest Xacobeo, presente en dez categorías.

Canda a estes, fan parte da listaxe citas como o Sinsal SON Estrella Galicia, que opta a oito galardóns, o Pasatempo, o Revenidas ou o FIV de Vilalba con opcións a sete premios, ou o Río Verbena, a competir en seis ámbitos. A estes hai que sumar os galardóns á mellor fotografía, no que compiten once imaxes dos diferentes eventos galegos.

En total, o público pode votar en doce categorías que contan con representación galega. Destaca neste sentido a presenza na categoría de eventos de grande tamaño, onde optan ao galardón O Son do Camiño e mais o PortAmérica. Nos eventos medianos compiten o FIV de Vilalba, o Revenidas, o Río Verbena Fest e mais o SonRías Baixas, mentres nas propostas de pequeno formato, o noso país está representado polo 17º Ribeira Sacra, o ciclo Acustiquísimos, o Festival do Pasatempo, o Festival Sinsal SON Estrella Galicia, o Noites do Porto e o Underfest Xacobeo. Nos festivais de interior, á súa vez, compiten Acustiquísimos e Underfest.

É de sinalar tamén a candidatura do Festival dos Eidos a Mellor festival non musical e mais do Asalto ao Castelo de Vimianzo e da Festa do Marisco de O Grove que compiten na categoría de mellor festividade.

En canto a artistas do país, é posible votar as actuacións de Rebeliom do Inframundo no Revenidas e de Tanxugueiras no SonRías Baixas como as mellores do ano no ámbito ibérico. Tamén compite, no ámbito da electrónica, Galician Army polas súas propostas no PortAmérica e no Río Verbena.