Javier Expósito (esquerda) cos alcaldes de Ribeira e Pontevedra na recollida dos Premios da Cultura Galega 2023. Fonte: Consellería de Cultura
A Academia Galega de Belas Artes sumou tres novos membros no seu plenario do pasado 30 de novembro. Segundo deu a coñecer a entidade, Javier Expósito Paradela, fundador do Museo do Gravado e da Fundación Museo de Artes á Estampa Dixital en Artes (Ribeira) ingresará na entidade como membro de honra.
Esta categoría concédeselle "a aquelas persoas que sexan consideradas de relevante e consagrada personalidade artística ou a grandes protectores ou investigadores das artes, ou que se distingan, de modo eximio, no patrocinio e fomento das artes de Galicia".
Canda a el, a entidade aprobou tamén a incorporación como académicos correspondentes do escultor e profesor universitario Jorge Varela Barrio, canda ao arquitecto mexicano Juan Ignacio del Cueto Ruiz-Funes, Director da Facultade de Arquitectura da Universidade Autónoma de México.
O recoñecemento outórgaselle a persoas que "calquera que sexa a súa residencia, xulgue acredoras a esta distinción, polo mérito dos seus traballos artísticos ou de investigación, ou sexan obxecto dun intercambio con outras academias, valorando, en todo caso, a súa vinculación con Galicia".
