Vigo terá o seu mercado de arte contemporánea

'Vigo Arte Contemporánea, VARCO' é o nome que terá este novo encontro que se celebrará do 12 ao 15 de decembro no vestíbulo do Auditorio Mar de Vigo coa participación de 30 artistas tanto emerxentes como cunha traxectoria consolidada. Durante os catro días que dura o evento haberá a oportunidade de entrar en contacto cos 30 artistas participantes e de adquirir directamente a súa obra en cada un dos postos. Fundamentalmente haberá artistas galegos e maiormente de Vigo, ademais dun artista estranxeiro, Ricardo Campos en representación de Portugal como país invitado desta primeira convocatoria. A listaxe completa xa está dispoñible. A iniciativa está comisariada por Eva López Tarrío e conta no comité organizador con Tatiana Lameiro, Noa Blanco e Alba Crispín. Durante a cita desenvolveranse obradoiros, conferencias e concertos en directo, entre outros actos.