Ferrería do Bogo. Fonte: Turismo de A Pontenova
Este venres 25 de outubro o Concello da Pontenova oficializaba a adquisición da Ferraría de Bogo. Esta construción preindustrial datada no século XVI está na actualidade en ruínas, e a intención do goberno local é restaurala e musealizala, ademais de dedicar parte do complexo a apartamentos turísticos.
A adquisición realizouse mediante un préstamo sen intereses da Xunta de 150.000 euros, e o Concello ten por diante un investimento aproximado de 2 millóns de euros para desenvolver o proxecto de rehabilitación. Esta antiga fábrica xa vira un proxecto de rehabilitación en 1993 da man da Xunta. Desde aquela, no entanto, o complexo quedou sen uso e sufriu de novo a ruína.
A intención do Concello é solicitar a declaración como Ben de Interese Cultural deste elemento. Aínda que o primeiro rexistro sobre a factoría é do século XVI, os restos da edificación actual datan do século XVIII. A ferraría estivo en activo ata finais do século XIX.
