AGalega, a plataforma de contidos dixitais da Televisión de Galicia estrea este xoves, 10 de outubro, o programa 'Recollendo Músicas', un novo formato producido por Undodez S.L. que explora a pegada dos sons e os ritmos tradicionais nas músicas actuais. 'Recollendo Músicas' indaga no influxo que as nosas músicas tradicionais teñen nos ritmos, sons e na produción de artistas e bandas actuais. Ao longo de dez episodios, o formato achega a visión persoal dos artistas arredor das nosas músicas de raíz, compoñendo unha visión de conxunto que nos axuda a comprender mellor o gran momento que vive a música galega tanto a nivel creativo como de públicos. Cada semana a plataforma publicará dous episodios, cada un deles cun artista ou formación como protagonista. Os dous primeiros serán a cantora Belém Tajes e os Comando Curuxás. Alana, Nebra, Breo, Lontreira, Moura, Abril, Carme López e Carabela son os protagonistas desta primeira temporada. A dirección e guión son obra de Saúl Rivas e Borja Casal.
