Miguel Rodríguez Monteavaro. Fonte: Impronta Editorial
O xurado do Premio de Poesía Afundación daba a coñecer na tarde deste 30 de setembro o fallo da vixésima segunda xeira deste galardón. O poemario Cortar pescado en Manila, do asturiano Miguel Rodríguez Monteavaro, foi seleccionado como vencedor desta edición. O premio reportaralle ao seu autor 7.000 euros en metálico, ademais de ser publicado na colección "Arte de trobar".
O xurado, que seleccionou esta obra entre os 32 orixinais que se presentaron ao certame, apuntou que o texto presenta "un interesante percorrido formal que emprega con habelencia o efecto de distanciamento para tratar temas próximos como a realidade laboral, o amor, a violencia..., pero tamén toda a beleza que se pode atopar neses ámbitos. Desde o punto de vista poético, o autor manexa con habelencia o ritmo lírico e narrativo para crear un texto unitario".
O comité de selección estivo composto por Héitor Mera, Inma López Silva e María Neves Soutelo como representantes vogais e profesionais da escrita; o escritor Xabier Castro Martínez como secretario e Luís González Tosar, presidente do Centro PEN de Galicia a actuar como presidente.
Afundación e o Centro PEN de Galicia, co patrocinio da Xunta de Galicia, convocan este galardón. Rodríguez Monteavaro, nado en Oviedo, é profesor da universidade desta cidade e ten recibido diferentes galardóns en Asturias pola súa actividade literaria, que desenvolve tanto en asturiano como na variante oriental do galego.
