Félix Fernández estrea en Vigo a montaxe autobiográfica 'Xavier a través de min'

A sala viguesa Teatro Ensalle abre hoxe a súa tempada escénica coa estrea da peza de danza contemporánea 'Xavier a través de min', do creador Félix Fernández. Venres, sábado e domingo Fernández subirá ao escenario a ofrecer esta montaxe, que inicialmente estaba prevista para presentarse o pasado xullo, na que explora múltiples recursos creativos para converter a sala nun lugar íntimo no que elaborar esta proposta de corte autobiográfico na que tenta presentar o legado inmaterial que o seu falecido irmán Xavier, que se suicidou fai 12 anos, lle deixou en vida e, nas súas palabras, " deixar ó descuberto todo o sedimento da vida do meu irmán en min".

As principais ferramentas para vehicular este contido tan emocional son a danza, o espazo sonoro-musical, a voz, o texto e a instalación, que mesturadas compoñen unha experiencia vivencial moi próxima a un lugar de intimidade onde atopar un espazo de liberación enerxético pouco habitual. O autor presenta unha experiencia escénica "afastada dun perfeccionismo técnico, para achegar ó público a un testemuño artístico no que encarno unha enerxía compartida froito das experiencias vitais que ambos vivimos de xeito paralelo". Este traballo púidose levar a cabo gracias ó apoio de A Casa Vella a través dunha axuda PICE, da convocatoria de residencias artísticas Atopémonos Bailando, do MUSEO MIHL de Lugo, do Festival Escora, da plataforma galega para artes performativas contemporáneas De Corpos Presentes e do Espazo de intervención artística da Universidade de A Coruña, NORMAL. Os días 27, 28 e 29 ás 20:00h poderase ver esta montaxe.