Na próxima edición, a número 29º da historia do festival, o OUFF continuará facendo de Ourense o centro do cinema con estreas nacionais e internacionais. Nesta edición unha das figuras homenaxeadas será o cineasta ourensá Carlos Velo, coa estrea dunha versión restaurada do filme Raíces, que cumpre 70 anos. Por outra banda, o OUFF aumenta o seu compromiso cos novos talentos do cinema nas súas seccións Fas Muvis ,un concurso no que varios equipos teñen que rodar unha curta durante o festival, e Fas Curtas, o certame de curtametraxes dirixido ao alumnado e novos profesionais do sector. A programación completa do festival así como as e os premiados da próxima edición desvelarase proximamente. Ademais, o Centro Cultural Marcos Valcárcel acollerá unha exposición do fotógrafo Manuel Outumuro, un dos nomes de referencia na fotografía contemporánea con proxectos vencellados cos actores e directores do cinema español. Outumuro é tamén o autor do cartel oficial da 29º edición.