Xosé Carlos Carracedo faise co III Premio Exeria de Creación Literaria

O escritor compostelán Xosé Carlos Carracedo Porto foi seleccionado como gañador do III Premio Exeria de Creación Literaria, que organiza o Concello de Santiago en colaboración coa Residencia Literaria 1863. O autor recibirá un premio de 3.000 euros en metálico e desenvolverá unha residencia dun mes en Montegiovi (Toscana- Italia) para completar o seu proxecto de novela.

O xurado acordou por unanimidade concederlle o galardón pola súa proposta dunha "novela arredor da infancia, a memoria e a identidade" que cualificaron como "un proxecto sólido, con grande ambición literaria e cun plan de traballo ben definido e artellado e viable no tempo".

O fallo tamén destacou "a definición dos espazos, estrutura e personaxes avalan o compromiso e a responsabilidade creativa do proxecto, ademais da vinculación expresa do proxecto coa cidade de Santiago e pon en valor a súa calidade literaria".

A escritora Rosa Aneiros, a editora e xestora cultural Eva Mejuto e a editora Andrea María Jamardo foron as responsables de seleccionar o proxecto gañador entre as sete propostas presentadas a concurso.