Iria Collazo, profesora de secundaria do IES As Barxas (Moaña), foi a gañadora da primeira bolsa do programa de intercambio cultural entre escritores galegos e xeorxianos promovida pola Consellería de Cultura coa colaboración da Residencia Literaria 1863. Collazo, que ten publicado novelas, libros de relatos, obras de literatura infantil e poesía, desenvolverá en setembro na Writer's House de Tblisi uha historia sobre "dous consogros, unha sorte de road trip rural embargada pola nostalxia". O obxectivo do programa "é contribuír á proxección exterior da literatura galega". En virtude do mesmo programa, un escritor xeorxiano realizará o propio na Coruña, pasando un mes na Residencia 1863.
