A vila de Zas convértese este sete de agosto na capital do audiovisual galego. A Coordinadora Galega de Festivais de Cinema Proxecta organiza nesta localidade o I Encontro Atlántico de Festivais de Cinema, unha cita que pretende "crear un espazo relacional que inclúa outras áreas do sector audiovisual, facilitando o debate e a reflexión conxunta entre representantes de festivais de cinema, cineastas e profesionais da industria".
A iniciativa comezará ás 11:30 co acto de inauguración, ao que seguirá unha conversa entre cineastas e profesionais da programación en festivais co título "Para que serven os festivais de cinema?". Durante a tarde está prevista unha visita ás Torres do Allo, e a partir das 19:30 o Auditorio Municipal amosará unha selección de pezas programadas no festival local dos Premios Fouciño.
A seguir, poderá verse unha selección de curtas, incluíndo traballos de cineastas galegas como Anxo Fazáns, Andrea de la Iglesia, Xacio Baño ou Oscar Pardo Cartelle. A Praza do Campo fechará a xornada coa proxección ao aire libre de O corno de Jaione Camborda.
Segundo apunta a organización do encontro "a través desta actividade, os representantes de certames poderán coñecer a percepción dos cineastas sobre os seus eventos e comprender mellor como inflúen ás súas traxectorias. Pola súa parte, os cineastas terán a oportunidade de entender as dinámicas de traballo dos festivais, incluíndo o procesos de selección de obras".
